ಕಾಣದ ದೇವರ ಕಾಣದೆ ಕಂಡೆನು.

ಎತ್ತ ಹೋಗಲೆಂದು ತಿಳಿಯದ ನನಗೆ
ಕೈ ಅಲ್ಲಿ ನೀಡಿದ ಕುಂಚವ,
ತಿರುಗಿಸಿ ಪಳಗಿಸಿ ಕಂಡೆನು
ನಿನ್ನ ದಿವ್ಯ ರೂಪವ.

ಜಕಣನ ಕೈಗೆ ಕಂಡ
ಶಿಲೆಯಲ್ಲೂ ನಿನ್ನ ಸ್ವರೂಪವ,
ಮತ್ತೆ ಮತ್ತೆ ನೋಡ ಬಯಸದೇನು
ಕಲೆಯಲ್ಲಿ ಕಂಡ ಕೈಲಾಸವ.

ಕೈ ಸೆರೆ ಹಿಡಿದ ಕ್ಷಣದಲ್ಲಿ
ಶಿವನು ಬಿಡಿಸಿದ ಚಿತ್ರವ,
ಚಿಲಿಪಿಲಿಗುಟ್ಟುವ ಸದ್ದಿಗೆ
ಕೇಕೆ ಹಾಕಿದ ಮಗುವಿನ ನೃತ್ಯವ.

ಬಣ್ಣ ಬಡಿದರೇನು ?
ಕಾಲು ಕುಣಿದರೇನು ?
ಶಿವನು ಮೆಚ್ಚದ್ದು ನೃತ್ಯವೇ ?
ಮನಸಿಗೆ ಶರಣಾಗದ್ದು ಕಲೆಯೇ ?

ಎತ್ತ ನೋಡಿದರೂ ಡೊಂಬರಾಟ,
ಮೆಟ್ಟಿ ನಿಲ್ಲುವವನೇ ಶಿವ.
ಆತ್ಮ ಸಾಕ್ಷಿಗೆ ಕಾಣದ್ದೇನಿದೆ ?
ಯಶಸ್ಸು ಒಂದು ನೆಪವೇ.

ಮತ್ತೆ ಮತ್ತೆ ಹೇಳಲು ಬಯಸುವೆ,
ಶಿವ ಎಲ್ಲೆಂದರೆ ನನ್ನ ಕಲೆಯಲ್ಲಿ.
ಶಿವ ಎಲ್ಲೆಂದರೆ ನನ್ನ ಮನದಲ್ಲಿ.
ಶಿವ ಎಲ್ಲೆಂದರೆ ನನ್ನ ದೃಢ ಚಿಂತನೆಯಲ್ಲಿ.

ನನ್ನ ಅರಿಯುವ ಮಾರ್ಗವೇ ಕಲೆ.
ನನ್ನಲ್ಲೇನಿದೆಯೋ ಅದೇ ಶಿವ.
ನಾ ನನ್ನ ಅರಿಯದೆ ಶಿವನೆಲ್ಲಿ ದಕ್ಕುವನು.
ಕಂಡರಿಯದ ಕಣ್ಣೇ ನನ್ನ ಕಲೆ.

ಕಾಣದ ದೇವರ ಕಾಣದೆ ಕಂಡೆನು.
ಶಿವ ನಿನ್ನ ರೂಪವ
ನನ್ನ ಕಲೆಯಲ್ಲಿ
ನನ್ನ ಮನದಲ್ಲಿ.

- ಅಲೆಮಾರಿ ಕವಿ