ಪ್ರೀತಿ  ಎಂಬ  ಕಡಲಲಿ
ತೇಲಿ ಹೋದರೇನು ?
ಬರುವೆನಲ್ಲಾ  ದಡಕ್ಕೆ 
ನುಚ್ಚು ನೂರಾಗಿ ನಾನು.

ನಿನ್ನ ಪ್ರೀತಿಯಿಂದ ದೂರ,
ಹೋಗಲೆಂದು ನಾನು
ಈಜಿ  ಈಜಿ ಹೋದರೆ
ಆಳಕ್ಕೆ ಕರೆದುಕೊಳ್ಳುತ್ತಿರುವುದು  ಏನು ?

ಸುಂದರ ಕಡಲು
ಚಂದದ ಸೂರ್ಯನ
ಮುಟ್ಟುವ ಧೈರ್ಯವೇಕೆ?
ಬೂದಿಯೋ  ಚೂರೋ  ಏನೆಂದು ಕಾಣೆ.

ಜಾತಿ  ಎಂಬ  ವಿಷದಲ್ಲಿ
ಧರ್ಮವೆಂಬ  ಕಳೆದು  ಹೋದ  ದಾರಿಯಲಿ,
ನಿನ್ನ ನೋಟವೇಕೆ
ನನ್ನ  ಕುರುಡು  ಮಾಡಿಸಿತು ?

ನಿನ್ನ  ಕೋಪದಲ್ಲಿ
ಸೂರ್ಯನ ನಾನು ಕಂಡೆ.
ನಿನ್ನ ಪ್ರೀತಿಯಲ್ಲಿ 
ಸುಂದರ ಕಡಲನು ಕಂಡೆ.

ಎಷ್ಟು ಆಳವೆಂದು  ತಿಳಿಯಲು,
ಎಷ್ಟು ತಾಪವೆಂದು ಅನುಭವಿಸಲು,
ಇಳಿದು ಜಿಗಿದು ಇಳಿದರೆ
ಹೊರಬರಲು ದಾರಿಯೇನು ?

ಸಮಾಜವೆಂಬ ಕಣ್ಣು
ಕಟ್ಟುಪಾಡು ಎಂಬ ಬೇಲಿ,
ಹರಿದು ಹಾಕಲಾರದ ಕೈ,
ಸುಳಿಯಲ್ಲಿ ಸಿಕ್ಕಿರುವ  ಕಾಲು.

ಕೊನೆಗೂ ಒಡೆದು ಹೊರಬರಲು,
ಒಡೆದು ಹೋದ ಮನಸ್ಸಿಗೆ,
ಚೂರು ಚೂರಾದ ಹೃದಯಕ್ಕೆ,
ಭರವಸೆಯೇ ಮುಲಾಮು.

ಹಿಡಿದು ಬಂದ ದಾರಿ
ನೋವಿನಿಂದ ನಡೆಸಿದ ಬದುಕು,
ನನ್ನ ನಾ ಕಂಡುಕೊಂಡ  ಬಗೆ,
ಬೆಚ್ಚಿ  ಬೀಳಿಸುವ  ಕಥೆ,

ಹೇಳಿದರೆ ಕಥೆ ಮುಗಿಯದು.
ಮುಗಿದರೆ ಅದು ಕಟ್ಟ ಕಥೆಯು
ದಡಕ್ಕೆ ಸೇರಿದ್ದೇ ಒಂದು ಸಾಹಸಗಾಥೆ. 
ನುಚ್ಚು ನೂರಾದ ಕನಸ್ಸೇ ಒಂದು ಜೀವನಗಾಥೆ.  

ಇಲ್ಲೊಂದು ಜೀವ ಹೋದಂತಿದೆ,
ಕಾರಣವೇನು ತಿಳಿಯದಾಗಿದೆ,
ದೇಹ ಆತ್ಮಕ್ಕೆ ಕೊಂಡಿ ಬಿಚ್ಚಿದೆ,
ಸ್ನೇಹ ಪ್ರೀತಿಯು ಅಮರವಾಗಿದೆ.

ಕಳೆದುಕೊಂಡೆ ಏನು ನಾನು ?
ನಗುವೇ ಏನು ನಿನ್ನ ಮೋಸ ?
ಹಿಂದೆ ಇದ್ದ ನೋವಿನಲ್ಲಿ
ಮೆರೆದು ಬಿಟ್ಟ ಜೀವ ನೀನು.

ಮರೆಯಲೆಂದೇ ತೆವಳಿದೆ ನಾನು,
ಮುಗ್ದ ಮೊಗದ ನೆನೆಸಿಕೊಂಡು
ಕರೆದರೆ ಬರುವುದಿಲ್ಲವೆನ್ನುತಿತ್ತೆ !
ಈ ಹಾಳುಮುಳು ತಿಂದ ದೇಹವು.

ಮನಸು ಒಂದು ವಿಚಿತ್ರವೂ
ಹೇಳು ಹೇಳದ ಕಪಟ ಸೂತ್ರದಾರನು,
ಹೇಳದಿರೆ ತುಸು ನಾಚುವುದು ,
ಹೇಳದಿದ್ದರೆ ತಡಬಡಿಸುವುದು.

ದೇಹ ಒಂದು ಪಾಕಶಾಲೆಯು
ರುಚಿಸಿದರೆ ನಾಲಿಗೆ ಬಿಡದು,
ದೇಹದ ರುಚಿ ತಿಂದ ಕಾಮನ
ಹೃದಯದ ಬಣ್ಣ ನೋಡುವವರಾರು ?

ಪ್ರೀತಿ ಕಾಮದ ನಡುವಿನಲ್ಲಿ
ಸೋತು ಬೆಂದ ಕೂಸು ನೀನು.
ನೋವಿಗೆ ಮುಲಾಮು ಹಾಕಿದೆನಷ್ಟೆ,
ನೋವನ್ನೇಕೆ ಕೊಲ್ಲದಾದೆನು.

ಮರೀಚಿಕೆ ಮರೀಚಿಕೆ
ಜೀವನ ಒಂದು ಮರೀಚಿಕೆ ,
ನಿನ್ನ ಸಾವ ಮುಂದೂಡಿದೆ,
ಸಾವನೇಕೆ ಜಯಿಸದಾದೆನು .

ಸಾವು ಎಂದೂ ಕೊನೆಯಲ್ಲ
ನಿನ್ನ ನೋವು ಎಂದೂ ಮರೆಯಲ್ಲ,
ದೇಹ  ಸುಖದಿ ಪ್ರೀತಿ ಮರೆತ
ಜೀವನ ಎಂದೂ ನಡೆಯಲ್ಲ.
ಮೋಸದಿಂದ ಬಾಳಿದಾತ
ನಿನ್ನ ಸಾವು ಕೂಡ ಈ ಮಣ್ಣಿಗೆ ಕೊನೆಯಲ್ಲ.

ಎಲ್ಲಿ  ಕೂತಿರುವೆ 
ನನಗೆ  ಪ್ರೀತಿಯ  ಕಲಿಸಿ.
ಎಲ್ಲಿ  ನಗುತಿರುವೆ
ಸ್ನೇಹದ  ಗೆರೆ  ದಾಟಿ .

ನಗುವಾಗಲಿ  ಅಳುವಾಗಲಿ
ಕೈ  ಹಿಡಿದು  ನನ್ನ  ನಡೆಸಿದೆ  ಓ  ದೇವತೆ.
ಕನಸೆನ್ನುವುದು  ಏನೆಂದು
ತಿಳಿಗೊಡಿಸಿದ  ಆ  ತನ್ಮಯತೆ.

ಮಲೆನಾಡಿನ  ತಂಗಾಳಿಗೆ
ನೀ  ಸೆಳೆದಾಗ  ಬಂದ ಬಿಸಿ  ಗಾಳಿಯು,.
ಕಣ್ಮುಚ್ಚಿ   ನೆನೆದಾಗ
ಬಂದ  ಬಿಗಿದಪ್ಪುಗೆಯು.
'
ಮರವಂತೆಯ  ಅಲೆದಾಡುತ
ಸೂರ್ಯನ  ಚಂದ್ರನ  ಕಿರಣಕೆ
ಮೈ ಸೋಕಿದಾಗ  ತಂದ  ತಿಳಿ  ಆಸೆಗೆ
ಎಳೆನೀರಿನ  ತಿಳಿ  ಲೇಪವು.

ನೀ ಓಡಿಸಿದ  ಗಾಡಿಯ ವೇಗಕೆ
ಹೆದರಾದರೂ  ಹಿಡಿದ  ಬಿಗಿದಪ್ಪುಗೆಯ
ನೋಡಲೆಂದೇ  ಬಂದ  ನವೀಲಿನ 
ಬಣ್ಣದ  ನೋಟವು , ಸುಗ್ಗಿ ಸುಗ್ಗಿ ನೃತ್ಯವು

ಹಿಂದೆ ಹಿಂದೆ ಹೋದ ಸಾಲು ಮರಗಳು 
ಇಣುಕಿ  ಇಣುಕಿ  ನೋಡಲೆಂದು 
ಕನ್ನಡಿಯಲಿ  ಕಂಡ  ನಿನ್ನ ಮುಗುಳುನಗೆಯು
ಅದನ್ನು ಕಂಡು ಹಿಗ್ಗಿದ  ಅಂಕು ಡೊಂಕು ಮರಗಳು

ಜಲಪಾತದಲ್ಲಿ  ನಡೆದಾಡಿದ
ನಿನ್ನ ಆ  ಮೈಮಾಟವು
ರತಿಯನ್ನೆ ನಾಚಿಸಿದ್ದು . 
ಮನ್ಮಥನ  ರಂಜಿಸಿದ್ದು .

ಮೋಡದ  ಮರೆಯಲಿ
ಮಗುವನ್ನು  ಕುಣಿಸಲು 
ನೀ  ಮಾಡಿದ ನೃತ್ಯಕೆ
ವರುಣನೇ  ಮಳೆಗೆರೆದಿದ್ದು

ಎಲ್ಲಿ  ಕೂತಿರುವೆ
ನನ್ನ  ಪ್ರೀತಿಯ  ಓ  ಗೆಳತೀ
ನನ್ನ  ಹೃಯದ  ಪ್ರಣಯಕ್ಕೆ
ನೀ  ಒಡತಿ  .. ನನ್ನೊಡತಿ .