ನಾ ಬರೆಯದ ಆ ಕವನ

ನಾ ಬರೆಯದ ಆ ಕವನವ
ಮನದೊಳಗೆ ಅದುಮಿಟ್ಟು ಕುಳಿತು
ಕಣ್ಣಿರಿನ ಹನಿಯೊಂದಿಗೆ ಸರಸವ ಆಡಿ
ಕಾಡ್ಗಿಚ್ಚಿನಂತೆ ಹರಡಿರುವ ಪ್ರೀತಿಯ
ಹೃದಯದಿಂದ ಬೇರ್ಪಡಿಸಲಾರದೆ
ಕೈ ಕಟ್ಟಿ ಕುಳಿತಿರುವಂತಾಗಿದೆ ಈ ನನ್ನ ಬದುಕು.

ನನ್ನಲ್ಲಿ ಮೂಡಿದ ಚಿತ್ರವ
ಜೋಡಿಸುತ ವರ್ಷವೇ ಕಳೆದಿವೆ.
ಪ್ರತಿ ಚಿತ್ರದಲೂ ನಿನ್ನ ನೆರಳ ಛಾಯೆಯು
ಅಗೋಚರವಾಗಿ ಕಾಣಿಸುತ್ತಿರಲು
ಮೂಡಿದ ಚಿತ್ರವ ಛಿದ್ರಗೋಳಿಸಲಾರದೆ
ತಲ್ಲಣಿಸುತಿದೆ ಈ ನನ್ನ ಕನಸ್ಸು

ನನ್ನಲ್ಲಿ ಪ್ರತಿಫಲಿಸುತ್ತಿರುವ ಧ್ವನಿಯು
ನಿನ್ನಯ ಸಂಗೀತವಾಗಿ ಮಾರ್ಪಡುತ್ತಿರಲು
ಆ ಸಂಗೀತದ ಪ್ರತಿ ಪದಗಳೂ
ನಿನ್ನಯ ನಗುವಿನ ರೂಪವ ಪಡೆಯುತ್ತಿರಲು
ಆ ಧ್ವನಿಗೆ ಪೂರ್ಣವಿರಾಮ ಹಾಕಲಾಗದೆ
ದಿಕ್ಕೆ ತೋಚದಂತಾಗಿದೆ ಈ ನನ್ನ ಮನಸ್ಸು

ನಾ ಬರೆಯದ ಆ ಕವನವ
ಬರೆಯಲೆಂದು ಕುಳಿತರೆ
ಕೈಗೆ ತಾಕುವಂತಿದೆ ನಿರಾಸೆಯ ಕಾರ್ಮೋಡಗಳು
ಬರೆಯದೇ ಸುಮ್ಮನೆ ಕುಳಿತರೆ
ಹೃದಯದ ಬಿಸಿ ತಣ್ಣಗಾಗದೆ
ಉರಿಯುವಂತಾಗಿದೆ ಈ ಪದಗಳ ವೈಮನಸ್ಸು .